Agusan del Norte — Padayon ang road clearing operations sa Barangay Poblacion 2, Tubay human natapok ang mga debris sa dalan tungod sa padayon nga kusog nga ulan ug hangin nga gidala sa Tropical Storm Ada.
Ang mga personnel sa Municipal Disaster Risk Reduction and Management Office (MDRRMO), kauban ang lokal nga mga awtoridad ug response teams, gilayon nga gipadala aron tangtangon ang nangahulog nga mga sanga sa kahoy, lapok, ug uban pang debris nga nagbabag sa dalan ug naghulga sa kaluwasan sa mga motorista ug mga residente sa palibot.
Sumala sa mga awtoridad, ang maong operasyon tumong nga mabalik ang normal nga daloy sa trapiko ug masiguro ang kaluwasan sa katawhan, ilabi na samtang padayon pa ang dili maayong kahimtangan sa panahon. Giawhagan ang mga motorista nga mag-amping sa paglabay sa maong lugar samtang nagpadayon ang clearing operations.
Magpadayon ang road clearing hangtod hingpit nga mahawan ug mahimong luwas nga agianan ang apektadong dalan.(Camille Santos Naraga)(Source: Contributed)