Nagpagawas ang Cebu City Government og Executive Order nga nagdili sa pagpalit, pagbaligya, ug pag-inom og bisan unsang klase sa ilimnon nga makahubog sulod sa 300 metros gikan sa tanang opisyal nga ruta sa Sinulog Grand Parade sa Enero 17 ug 18, 2026. Gipalibotan niini ang mga assembly points, parade routes, ug dispersal areas nga gideklarar sa siyudad ug sa mga organizer sa Sinulog.
Ipatuman ang liquor ban gikan alas 6:00 sa buntag hangtod alas 8:00 sa gabii sa duha ka adlaw sa pista. Lakip sa gidili mao ang pagpalit, pagbaligya, ug pag-apod-apod sa ilimnon, pag-inom sa publiko, pagdala og ilimnong makahubog sa open container, ug bisan unsang paagi sa paglikay sa maong mando.
Gipahimangnoan usab ang tanang negosyo sama sa mga bar, restawran, convenience store, sari-sari store, ug mga temporaryo ug mobile vendors sulod sa sakop nga lugar nga hugot nga motuman sa balaod.
Ang mosupak mahimong masuspenso o matangtangan og business permit, ug posibleng pasakaan og kaso subay sa existing nga balaod ug ordinansa.
Ang Cebu City Police Office (CCPO) maoy magpatuman sa liquor ban pinaagi sa pagpakatap og kapulisan sa mga ruta sa Sinulog ug palibot niini. Makigtambayayong ang CCPO sa Public Safety Office, Department of Public Services, mga barangay opisyal, ug ubang ahensya aron mokumpiskar sa iligal nga ilimnon ug dakpon ang mga mosupak.
Ang maong lakang gitumong aron masiguro ang kaluwasan, kahapsay, ug malinawon nga pagsaulog sa Sinulog Festival 2026. Ang Cebu City Government ug CCPO nag-awhag sa publiko ug negosyo nga motuman sa regulasyon, aron ang tanang deboto ug bisita maka-enjoy sa pista nga walay samok ug peligro.
Source: CCPO
I via Renante Socia Lada