DAVAO CITY – Gipahigayon ang pormal nga proklamasyon ni Governor Emmylou “Lala” Taliño-Mendoza sa iyang ikaduhang termino isip gobernador sa lalawigan sa North Cotabato atol sa usa ka seremonyang gihimo sa Sangguniang Panlalawigan (SP) Gallery Hall sa Amas, Kidapawan City. Ang proklamasyon gipangulohan sa mga sakop sa Provincial Board of Canvassers human sa opisyal nga pag-ihap sa mga boto sa nahuman nga piniliay.
Gawas sa reeleksyon ni Gov. Lala, midaug usab ang iyang pag-umangkon nga si Ella Taray isip Bise Gobernador. Sa edad nga 27, si Taray ang giilang pinakabatang bise gobernador sa kasaysayan sa North Cotabato, nga usa ka milestone sa politika sa probinsiya. Ang iyang kadaugan nagpakita sa pagsalig sa katawhan sa kabatan-onan nga liderato ug sa laing henerasyon nga mamuno sa serbisyo publiko.
Samtang ang anak ni Gov. Lala nga si Congresswoman Samantha Santos, wala nay nakaatbang sa maong piniliay, ug pormal nga giila nga mopadayon sa iyang mandato isip representante sa ilang distrito. Ang iyang pagpadayon sa panerbisyo usa ka timaan sa padayon nga suporta sa mga botante ug pagsalig sa iyang liderato.
Ang tibuok pamilya Taliño-Mendoza nagpanghimatuud sa ilang dedikasyon sa serbisyo publiko, ug ang ilang presensya sa panggobyernong posisyon nagpadayag sa lig-on nga mandato gikan sa katawhan sa North Cotabato. (camille Santos Naraga)(Source: Contributed)