DAVAO CITY — Patay ang suspetsado sa likod sa pagpusil-patay sa usa ka magtiayon, lakip ang buntis nga asawa, human kini misukol sa mga sakop sa Matalam Municipal Police Station atol sa ilang operasyon sa Barangay Poblacion, Matalam, North Cotabato.
Ang suspek giila nga si Alex Mamitel Mamad, residente sa maong lugar, nga may naatubang nang kaso sa korte nga Frustrated Homicide.
Base sa imbestigasyon sa kapulisan, nahitabo ang krimen niadtong Miyerkules sa gabii, Mayo 14, sa dihang manirado na unta sa ilang printing shop ang biktima nga maestro ug iyang buntis nga asawa. Misulod ang suspek ug namugos nga kuhaon ang motorsiklo sa magtiayon. Sa dihang mipalag ang maestro, diretsong gipusil kini ni Mamad, ug apil usab sa iyang gipusil ang buntis nga asawa.
Gipahigayon ang follow-up operation sa mga otoridad batok sa suspek. Sa ilang engkuwentro, misukol si Mamad gamit ang armas, hinungdan nga napugos ang kapulisan sa pagdepensa, nga miresulta sa iyang pagkaigo ug pagkamatay.
Padayon ang imbestigasyon sa kapulisan aron masuta pa ang uban pang motibo sa krimen ug kung adunay laing nalambigit sa kaso. (camille Santos Naraga)(Source: Contributed)