ISLAND GARDEN CITY OF SAMAL — Opisyal nang giablihan sa Bureau of Jail Management and Penology IGACOS City Jail ang bag-ong pickleball court isip kabahin sa ilang programa nga nagtutok sa kahimsog ug kaayohan sa mga Persons Deprived of Liberty (PDL) ug mga personnel sa pasilidad.
Sumala sa jail management, ang maong proyekto usa ka lakang sa pagpalig-on sa rehabilitasyon sa mga PDL pinaagi sa mga kalihokan nga makapauswag sa ilang pisikal ug mental nga kahimtang. Gipasabot usab nga ang rehabilitasyon dili lamang naglangkob sa pagdisiplina kondili lakip ang paghatag og mga oportunidad alang sa kalingawan, personal nga pag-uswag ug himsog nga kompetisyon.
Gilauman nga pinaagi sa paggamit sa pickleball court, mapalambo ang disiplina, panaghiusa ug kooperasyon tali sa mga magdudula, samtang naghatag usab kini og positibong pamaagi aron mapadayon ang maayong panglawas ug pangisip sa mga PDL ug personnel.
Ang maong inisyatiba kabahin sa padayon nga paningkamot sa IGACOS City Jail sa paghatag og mga programa nga mosuporta sa kaayohan ug epektibong rehabilitasyon sa mga anaa sa ilang kustodiya. (Camille Santos Naraga)(Source: Contributed)