DAVAO CITY – Patay ang mag-amahan human makigpabuto sa kapulisan atol sa drug buy-bust operation sa Sitio Ampatuan, Barangay Bongued, Datu Odin Sinsuat, alas 4:00 sa hapon, Lunes, Septyembre 1.
Matod sa report, miabot og duha ka oras ang engkwentro tali sa grupo sa mga suspek ug sa kapulisan nga sakop sa Datu Odin Sinsuat Police Station, 42nd Special Action Company PNP-SAF, ug Provincial Mobile Force Company sa Maguindanao del Norte Police.
Nagpakig-alayon usab ang mga otoridad sa 12th Mechanized Infantry Battalion sa Philippine Army aron makontrol ang sitwasyon.
Giila ang mga napatay nga sila si Mandangan Noden ug iyang anak nga si Iverson Noden, samtang nakaikyas ang ilang kauban nga si alyas James.
Nakumpiska sa operasyon ang lima ka sachet sa gituohang shabu nga nagkantidad og P1.6 milyon, usa ka M16 rifle, usa ka M14 rifle, ug duha ka magazine sa Glock 9mm. .(Camille Santos Naraga)(Source: Contributed)