DAVAO ORIENTAL – Balhog sud sa prisohan ang usa ka magtiayon nga nagpadagan og cybersex trafficking den sa Brgy. Lupon, Davao Oriental, atol sa gihimong operasyon sa mga personahe sa National Bureau of Investigation (NBI) Southeastern Mindanao Regional Office XI, kauban ang Anti-Human Trafficking Division (HTRAD) sa NBI Central Office ug Department of Social Welfare and Development (DSWD) XI, niadtong Hunyo 3, 2025.
Ang mga nadakpan giilang sila alyas Jackilou, 31-anyos; iyang bana alyas Victor, 34-anyos; ug igsuon nga si alyas Alberto, 41-anyos.
Matod sa NBI, ang mga suspek nagpaluyo sa online sex trafficking diin gigamit ang mga bata nga minorde-edad, pipila niini 13 anyos paubos, aron ipasundayag sa mga dayuhang kustomer nga nagabayad og dako nga kantidad.
Sa maong operasyon, nakumpiska ang daghang kagamitan sama sa mga computer, video camera, cellphones, suga, ug ubang gamit nga gigamit sa pag-record sa live nga mga pasundayag.
Dugang pa sa imbestigasyon, usa sa mga biktima nga naluwas sa operasyon anak mismo sa magtiayon nga suspek.
Ang mga minorde-edad nga biktima giluwas ug giluwatan dayon sa mga opisyal sa DSWD, ug gidala sa Davao Oriental Medical Center alang sa medico-legal check-up.
Padayon ang imbestigasyon samtang ang mga suspek gikatakdang atubangon ang mga kaso kalabot sa human trafficking ug cybercrime. (Camille Santos Naraga)(Source: Contributed)