DAVAO CITY – Nasikop sa gihimong buy-bust operation sa kapulisan ang usa ka mag-live-in partner nga giingong nalambigit sa pagpamaligya og illegal nga droga sa Barangay Buhangin, Davao City, kagabii, Hulyo 22, 2025.
Ang operasyon gipahigayon sa mga sakop sa San Pedro Police Station 2 pasado alas-11:00 sa gabii sa Kilometer 5, San Pedro Village.
Giila ang mga nadakpan sa ilang mga alyas nga “Mac-Mac”, 43 anyos, ug “Desiree”, 45 anyos, nga kapwa residente sa maong lugar.
Sumala sa report, napalitan ang mga suspetsado og usa ka elongated sachet nga adunay sulod nga gituohang shabu. Sa pag-inspeksyon, nakuhaan pa sila og dugang mga sachet nga ilegal nga droga nga gibanabana og kantidad nga P170,000.
Gidala dayon sa presinto ang mga suspek ug kasamtangang nagpabilin sa kustodiya sa kapulisan samtang ginalatid ang mga kasong ipasaka batok kanila.(Camille Santos Naraga)(Source: Contributed)