DAVAO DE ORO – Usa ka 17-anyos nga dalagita ang namatay samtang samaran ang iyang inahan human silang giatake sa mga putyukan samtang nagpahulay sa ilang payag sa kabukiran sa Barangay Fatima, New Bataan, niadtong Huwebes, Mayo 29, 2025.
Sumala sa amahan sa biktima nga si Emmanuel Cañas, nibisita sila sa ilang uma niadtong adlawa. Samtang siya nanghagbas, nagpahulay ang iyang asawa ug anak sulod sa payag. Kalit lang mitumaw ang kasaba sa mga putyukan ug ilang giatake ang payag.
Nagtuo siya nga luwas ang iyang mag-ina kay naa man kini sa sulod sa payag, apan nabalaka siya pagdungog sa pagpangayo og tabang sa iyang asawa nga nagguyod sa ilang anak.
Natingala siya pagtan-aw nga napuno og putyukan ang ulo sa ilang anak.
Wala kaayo maangol ang iyang asawa tungod kay giputos niini og jacket ang iyang ulo aron malikayan ang mga pamakak.
Dali silang gidala sa tambalanan, apan gideklarar nga dead on arrival ang dalagita. Na-admit sab sa ospital ang ginikanan aron tambalan sa ilang mga samad.
Nailhan nga ang dalagita adunay special needs, hinungdan nga pirmi kini kauban sa ginikanan aron matutukan og maampingan. (Camille Santos Naraga)(Source: Contributed)