DAVAO CITY – Gisubay sa inspection team nga gilangkuban sa Bureau of Plant Industry, Agribusiness and Marketing Assistance Division-XI, ug Office of the Secretary for Agribusiness and Marketing for Consumer Affairs ang mga bodega sa bugas sa rehiyon.
Lakip sa gi-inspeksyon ang J-Agro Trade sa Panacan, Nan Stu Agri Traders sa Sasa, ug Julu Enterprise, Inc. sa Talomo District aron masuta ang supply ug kalidad sa local ug imported nga bugas. Ang kalihokan subay sa direktiba ni DA Secretary Francisco Tiu Laurel Jr. human sa iyang meeting sa mga rice importers niadtong Setyembre 4, 2025.
Gisusi sa grupo ang mga lokal nga variete sama sa Tonner, Ilang, ug Malagkit nga gikan sa SOCCSKSARGEN, Cotabato Province, Banaybanay, ug Davao del Sur, samtang ang kadaghanan sa mga imported rice gikan sa Vietnam. Gitan-aw usab ang distribution channels aron masiguro ang transparency ug monitoring sa merkado.
Matud sa Department of Agriculture, ang inspeksiyon nagtinguha sa pagmintinar sa balanseng rice supply chain, pagpugong sa hoarding ug price manipulation, ug paggarantiya sa pirming suplay sa luwas ug abot-kayang bugas para sa mga konsumidor. (Camille Santos Naraga)(Source: Contributed)