DAVAO CITY — Patay ang usa ka lalaki human gipusil samtang nagsakyay sa iyang motorsiklo sa Purok 8, Manggahan Street, Muslim Village, Bacaca, Davao City, bandang alas 1:31 sa kaadlawon, Disyembre 6, 2025. Giila sa kapulisan ang biktima nga si Zairon Guinaid Balik, residente sa Purok 4, Isla Verde, Barangay 23-C.
Base sa inisyal nga imbestigasyon, nagpadulong unta ang biktima sakay sa iyang motorsiklo apan pag-abot sa usa ka ngitngit nga parte sa dalan, kalit siyang gipusil sa wala mailhing armado. Makaduha ka higayon siya naigong bala sa ulo.
Dayon nga niresponder ang kapulisan human madawat ang tawag sa Central 911. Nadala pa sa ospital si Balik apan gideklarar kini nga patay pag-abot didto.
Sumala sa Scene of the Crime Operatives (SOCO), duha ka basyo sa bala nga gituohang gikan sa .45 caliber pistol ang nakuha sa crime scene. Padayon pa ang imbestigasyon kay wala’y nakakita og klaro sa suspetsado tungod sa kangitngit sa lugar sa insidente.(Camille Santos Naraga)(Source: Contributed)