Nagpadayon ang imbestigasyon sa Police Regional Office 7 (PRO7) human makadawat sila’g reklamo nga gi-duplicate ang numero sa cellphone sa usa ka biktima ug gigamit aron mangilad og kwarta gikan sa iyang mga kontak.
Ang SIM card cloning usa ka matang sa digital nga pagpangilad diin gikopya sa mga kriminal ang importanteng datos sa SIM card sama sa IMSI ug authentication keys. Pinaagi niini, makahimo sila og kopya sa SIM card ug mahimong maka-access sa tawag, mensahe, ug personal nga impormasyon sa biktima. Kasagaran kini mahitabo tungod sa hacking, malicious software, o dili awtorisado nga pag-access sa mobile device.
Mipahimangno si Regional Director PBGEN Redrico A. Maranan sa publiko nga magmatngon batok sa mga pagpang-ilad nga mensahe, labi na kung kwarta ang hisgutan.
“I urge everyone to always verify the authenticity of messages you receive. When it involves monetary transactions, take a moment to double-check through a direct call or personal confirmation. Your vigilance is essential in preventing cybercriminals from taking advantage.”
Gi-awhag usab sa PRO7 ang publiko nga mosumbong dayon kung adunay nadawat nga ilad-ilad nga mensahe o kadudahang online nga kalihokan pinaagi sa Cybercrime Unit sa 0998-598-8105.
Padayon ang PRO7 sa pagpalig-on sa cyber safety ug pagpanalipod sa komunidad batok sa bagong hulga sa digital nga panahon.
Source: PRO7 PIO
I via Renante Socia Lada