DAVAO CITY – Patay ang usa ka lalaki human kini pusilon samtang nagtabok sa Daang Maharlika Highway, kilid sa Specialist Primary Care Hospital, sa Barangay Ilang, Davao City, pasado alas-3:00 sa hapon, Nobyembre 12, 2025.
Giila sa kapulisan ang biktima nga si Nel John Escorts Amalias, residente sa Purok Buhisan, Barangay Tibungco, ning siyudad.
Base sa inisyal nga imbestigasyon, nagtabok ang biktima sa highway dihang kalit kini duolon sa wala mailhing lalaki nga armado ug gipusil kini sa liog ug dughan. Didto dayon napalumpag si Amalias ug namatay sa samad nga nakuha.
Human sa insidente, dali nga misibat ang suspetsado samtang nakarekober ang mga imbestigador og basyo sa bala nga gituohang gikan sa .45 caliber nga pistola.
Sa pagpangusisa, nakit-an usab sa posisyon sa biktima ang duha ka sachet sa gituohang shabu, usa ka ice pick, coin purse nga adunay guba nga relo, lighter, kalo, buak nga tube, ug blade.
Padayon pa karon ang imbestigasyon aron matino ang motibo sa pagpamusil ug makilala ang responsable sa krimen. .(camille Santos Naraga)(Source: Contributed)