Davao del Sur – Usa ka empleyado sa lokal nga panggobyernong buhatan ang nadakpan human makuhaan og labaw ₱100,000 ang kantidad sa gituohang shabu atol sa drug buy-bust operation nga gipahigayon sa PDEA ug PNP sa Barangay Poblacion, Hagonoy, Davao del Sur, pasado alas-5:02 sa hapon, Nobyembre 12, 2025.
Giila sa mga awtoridad ang suspetsado nga si alyas “Renel”, 39 anyos, usa ka kawani sa Local Government Unit (LGU) sa Hagonoy.
Sumala sa ulat sa kapulisan, nakumpiska gikan sa suspetsado ang upat (4) ka sachet sa gituohang shabu nga adunay kinatibuk-ang kantidad nga ₱110,840.00.
Ang operasyon gipangulohan sa PDEA-Davao del Sur ug Provincial Drug Enforcement Unit (PDEU)-Davao del Sur uban sa tabang sa Hagonoy Municipal Police Station, 1st DSPMFC, 1104th RMFB, RID 11/PIT DavSur, PRO 11, ug PDEG SOU 11.
Padayon pa ang imbestigasyon aron mahibal-an kung adunay uban pang kasabwat ang suspetsado sa iligal nga kalihukan.(Camille Santos Naraga)(Source: Contributed)