Misangpot sa pagdakop sa usa ka Top Priority Illegal Drug Personality (TPIDP) ug High Value Individual (HVI) ang hiniusang anti-illegal drug operation nga gilusad sa mga awtoridad sa Sta. Cruz, Davao del Sur niadtong gabii sa Hulyo 4, 2026.
Ang nadakpan giila sa alyas “Bogs,” nga sumala sa kapulisan usa sa mga prayoridad nga target sa kampanya batok sa ilegal nga droga sa rehiyon.
Ang operasyon gipahigayon sa Regional Police Drug Enforcement Unit 11 (RPDEU 11) uban sa Sta. Cruz Municipal Police Station ug sa Philippine Drug Enforcement Agency (PDEA) Davao del Sur.
Sa operasyon, narekober ang daghang sachet ug usa ka cellophane pack nga adunay gituohang shabu nga adunay Standard Drug Price (SDP) nga gibanabanang ₱2.856 milyon. Lakip usab sa mga nasakmit ang lainlaing drug paraphernalia ug uban pang mga ebidensya nga may kalabotan sa ilegal nga droga.
Gihimo sa mga operatiba ang hustong pagmarka ug imbentaryo sa mga nakumpiskang ebidensya subay sa Section 21 sa Republic Act No. 9165, uban sa presensya sa suspek ug sa mga gikinahanglang saksi.
Sa pagkakaron, anaa na sa kustodiya sa Sta. Cruz Municipal Police Station ang suspek ug ang tanang nakumpiskang ebidensya, samtang giandam ang pagsaka sa mga kasong paglapas sa Sections 5, 11, ug 12 sa Republic Act No. 9165 o ang Comprehensive Dangerous Drugs Act of 2002.(Camille Santos Naraga)(Source: PDEA XI)