DAVAO CITY – Patay ang Provincial Information Officer sa Zamboanga del Sur human gipusil sa iyang kaugalingong security escort samtang anaa sila sa usa ka beach resort sa Purok Putting Balas, Barangay Limason, Huwebes sa gabii, Hunyo 29, 2025.
Giila ang biktima nga si Jesriel Gasper Himang, samtang ang babayeng kauban niini nasamdan sa insidente ug gihatod sa ospital alang sa medikal nga pagbulong.
Ang suspek giila lamang sa alyas nga “Reymond”, nga mao ang personal security escort sa biktima.
Sumala sa pahayag ni Capt. Brainhulla Sakkam, hepe sa Vincenzo Sagun Municipal Police, nag-una ang kasamok nga panaglalis tali sa tulo sa sulod sa usa ka function facility sa maong resort. Taud-taud nadunggan ang mga lupok sa armas ug didto na nakit-an nga naigo si Himang.
Narekober sa mga otoridad ang usa ka .45 caliber pistol nga giingong gigamit sa krimen. Gidakop dayon ang suspek ug kasamtangang gadetener samtang padayon ang imbestigasyon sa motibo sa pagpamusil.
Nagpahimangno ang kapulisan sa katawhan nga likayan ang bayolenteng panagbingkil ug ipahibalo dayon sa otoridad kung adunay makitang hulga sa seguridad. (Camille Santos Naraga)(Source: Contributed)