Gibutyag ni Cebu Governor Gwendolyn “Gwen” Garcia ang iyang pagbati nga kalipay ug kadasig samtang naghulat sa kataposang adlaw sa iyang termino karong umaabot nga Hunyo 30, human sa taas nga panahon sa pagserbisyo sa katawhang Sugboanon.
Sa usa ka pamahayag, miingon si Garcia: “I am just so excited nga mahuman na ang akong pag-alagad sa Sugbo karong Hunyo 30. Kay sa labing unang higayon sukad 2004, makasugod nakog hunahuna alang sa akoang kaugalingon.” Ang maong pamahayag nagpasabot sa personal nga kabag-ohan nga iyang giatubang human sa kapin duha ka dekada nga pagserbisyo sa lalawigan.
Gipasalig usab sa gobernador nga sa tibuok panahon sa iyang paglingkod, wala niya giangkon ang Sugbo isip personal nga kadaugan. “Kining Sugbo wala ug dili nako giangkon. Ang Sugbo giangkon sa mga Sugboanon,” dugang pa niya, nga nagpamatuod sa iyang pagtan-aw sa liderato isip usa ka serbisyo, dili usa ka katungod.
Si Garcia nailhan sa daghang mga proyekto, reporma, ug programa nga nakapasiugda sa kalamboan sa Cebu sa daghang aspeto sama sa turismo, imprastruktura, ug pagdumala sa natural nga kalamidad. Sa iyang paggikan, gilauman nga magbilin siya og lig-ong ligasiya nga magpadayon bisan wala na siya sa katungdanan.
Samtang nagkadool ang Hunyo 30, daghang Sugboanon ang nagpaabot sa pormal nga pagsira sa usa ka importante nga yugto sa kasaysayan sa pagdumala ni Gob. Garcia uban sa pasalamat ug panawagan sa malinawon nga transisyon sa liderato.
Si Gov-elect Pam Baricuatro ang muhulip ni Gov. Garcia nga nangandam na usab para sa pagserbisyo sa mga Sugbuanon.
Source: Cebu Provincial Capitol, PIO
I via Renante Socia Lada