DAVAO CITY – Gipresenta sa National Police Commission (NAPOLCOM) ang usa ka lalaki nga giila nga si Daryll Isidro human kini nagsul-ob ug nagdaot sa uniporme sa kapulisan atol sa usa ka Halloween party. Nangayo og pasaylo si Isidro ug nagpangatarungan nga iyang gitan-aw nga “superhero” ang mga pulis, maong napili niyang isuot ang maong uniporme.
Sumala ni NAPOLCOM spokesperson Atty. Rafael Calinisan, ang gibuhat ni Isidro usa ka kalapasan sa Revised Penal Code nga adunay silot nga priso gikan usa ka bulan ug usa ka adlaw hangtod unom ka bulan.
Gipasabot ni Calinisan nga ang pagsul-ob sa uniporme sa kapulisan nga walay awtorisasyon usa ka seryosong kalapasan ug porma sa kawalay pagrespeto sa institusyon sa Philippine National Police (PNP).
Dugang pa niya, ang uniporme sa kapulisan simbolo sa awtoridad ug pagsalig sa publiko, busa angay kining gamiton uban sa pagtugot ug dignidad.(Camille Santos Naraga)(Source: Napolcom)