Davao del Sur — Nadakpan sa kapulisan ang usa ka 54-anyos nga lalaki nga nagdala og .357 magnum revolver samtang nagasakay og motorsiklo nga walay side mirror sa checkpoint sa Purok 2, Barangay New Visayas, Matanao, Davao del Sur.
Ang suspetsado, nga giilang si alyas “Turo”, gitawag sa mga pulis aron ipangayoan og mga dokumento sama sa rehistro ug driver’s license aron hatagan unta og Temporary Operator’s Permit (T.O.P.).
Apan dihang giablihan sa suspetsado ang iyang sling bag, nasiplatan sa mga pulis ang usa ka baril. Sa dihang gipangayoan kini og papeles, wala siyay naipakita nga legal nga dokumento sa pagpanag-iya niini, hinungdan nga gilayon siyang gi-aresto.
Nakumpiska sa kapulisan ang .357 revolver ug unom ka bala gikan sa suspek. Ang motorsiklo nga iyang gidala ug siya mismo karon anaay kustodiya sa Matanao Municipal Police Station samtang gipangandaman ang kasong isasampa batok kaniya.(Camille Santos Naraga)(Source: Matanao MPS)