Davao del Sur — Nadakpan ang upat ka mga suspek atol sa joint drug buy-bust operation nga gihimo sa PDEA Davao del Sur ug Occidental, kauban ang PDEU-Davao del Sur, Digos City Police, ug 1104th Regional Mobile Force Battalion, sa Purok 7, Barangay Aplaya, Digos City, alas 5:35 sa hapon, Oktubre 24, 2025.
Base sa report sa PDEA Region XI, unang napalitan sa mga operatiba ang babayeng suspek nga giilang si alyas “Ivy,” 34 anyos, pinaagi sa ₱8,000 nga kantidad sa gituohang shabu, hinungdan sa iyang pagkadakop.
Sa pagsulod sa mga otoridad sa lugar, nadiskobrehan nga giingong drug den diay kini, ug nadakpan pa ang tulo ka laing mga suspek nga giilang sila alyas “Abdul,” “Jay-ar,” ug “Pablito.”
Nakumpiskar gikan sa mga dinakpan ang 19 gramos sa gituohang shabu nga adunay estimated market value nga ₱130,000.
Ang mga suspek karon gipahimutang sa kustodiya sa PDEA-XI ug mag-atubang sa kaso kalabot sa paglapas sa Comprehensive Dangerous Drugs Act of 2002 (RA 9165).(Camille Santos Naraga)(Source: Contributed)