DAVAO CITY — Ginasubay karon sa mga otoridad ang usa ka Ford Everest nga silver grey ang kolor ug adunay plate number LGV 717, human kini gisibat sa usa ka lalaki atol sa test drive sa Quezon Boulevard, Kidapawan City, sa hapon sa Oktubre 22, 2025.
Giila sa Kidapawan City Police ang tag-iya sa sakyanan nga si Vincent Salandanan, residente sa Purok Strawberry, Salandanan Subdivision, Población, Kidapawan City.
Base sa imbestigasyon, bandang alas 3:30 sa hapon, gikuha sa suspetsado ang sakyanan gikan sa usa ka finance corporation sa Kidapawan aron i-test drive, apan wala na kini mobalik human sa pipila ka oras.
Padayon na karon ang pagsubay sa kapulisan gamit ang mga CCTV footage sa maong lugar aron maila ug madakpan ang suspetsado.
Nanawagan usab ang mga otoridad sa publiko nga mohatag dayon og impormasyon kung aduna silay nakitang sakyanan o kahibalo sa nahimutangan niini.(Camille Santos Naraga)(Source: Contributed)