Davao de Oro – Giaresto ang usa ka drayber sa truck human kini maabtan sa mga kapulisan sa dihang mitubag sila sa report nga nadawat sa Nabunturan Municipal Police Station gikan sa duha ka concerned citizens. Ang report nagtumong sa usa ka puti nga Howo trailer truck nga kargado og sinakong bugas nga nakaparada sa atubangan sa balay sa usa ka barangay official sa Purok-6, Barangay Manat, alas 9:00 sa buntag, Mayo 6, 2025.
Sumala sa imbestigasyon sa kapulisan, nakita ang usa ka grupo sa mga tawo sa likod sa balay sa maong barangay kapitan nga naglinya ug nagdawat og bugas. Ang maong bugas gi-apod-apod uban sa presensya sa CVO/Barangay Police, ug giingong anaa usab ang personal secretary sa Barangay Chairman sa Población, Nabunturan, nga usa sa mga kandidato sa pagka-bise mayor sa lungsod.
Pag-abot sa mga sakop sa PNP ug representante sa COMELEC, tapos na og unload ang bugas ug nakasibat na ang personal secretary, mga CVO, ug Barangay Police. Ang truck driver na lamang ang ilang naabtan sa lugar, hinungdan nga kini giaresto.
Gibanabana nga 2,500 ka sako nga tag-25 kilos ang gidaghanon sa bugas sa truck, diin 1,000 niini ang na-apod-apod na. Nakuha sa kapulisan ang truck ug ang nabiling 1,500 ka sako sa bugas nga karon anaa na sa ilang kustodiya.
Padayon nga giimbestigahan ang driver nga kasamtangang anaas sa kustodiya sa police station.
Gipadayag sa kapulisan nga ilang padayon nga ipatuman ang balaod, aron masiguro ang kasaligan nga piniliay ug mapadayon ang kalinaw ug kahapsay sa komunidad.(Camille Santos Naraga)(Source: Contributed)