Davao del Norte – Nangayo og gamayng adjustment si Davao del Norte Governor Edwin I. Jubahib kang Davao City Mayor Sara Duterte-Carpio kabahin sa plano niini nga pahugtan ang pagsulod sa taga laing lugar ning dakbayan.
“Timbang-tibangon gayud kung unsay angayang himoun aron dili masakripisyo ang mga trabaho ug sa samang higayon, malikay ang katawhan sa inpeksyon sa Covid-19,” matud ni Jubahib.
Sa Executive Order No. 1 nga gipadala ni Duterte-Carpio sa Regional Inter-Agency Task Force (RIATF) niadtong Nobyembre 11, mihangyo si Duterte-Carpio nga limitahan sa essential travel ang mosulod sa dakbayan aron mapugngan ang pagsaka sa kaso sa Covid-19 sa syudad.
“Daku jud og epekto pero mag-meet mi halfway kay naa may mga taga-Davao nga mo-ari sab sa amo kay naa man diha ang mga regional offices, unya daghan sab diri nga naa nanarbahosa Davao,” pasabot ni Jubahib.
Matud sa Gobernador, iyang gisuportahan ang laraw ni Duterte-Carpio nga pugngan ang pagsulod sa taga laing lugar sa dakbayan aron malikay ang katawhan sa nagkataas nga kaso sa Coronavirus Disease.
“Mag adjust mi pero mohangyo gayud ko kay louy sab akong mga katawhan labina ang mga dunay opisyal nga transaction sa Davao ug katong mga negosyante,” sigon ni Jubahib.
“Akong isugyot nga unta ang mga taga Davao del Norte nga nanarbaho sa Davao pasudlon, apan kinahanglan nga gikan sa trabaho sa balay sila modiritso ug dili na manghapit-hapit,” sugyot sa Gobernador.
Saysay niini “Ang Davao man gud ang centro sa komersyo sa akong probinsya ug diha manukad ang kadaghanan sa mga epektos alang sa DavNor so, gawas sa essential, naa sab mi mga residente dinhi nga nanarbaho sa Davao.
Sumala sa gobernador, maghulat siya nga opisyal nga hisgutan sa Regional Inter-Agency Task Force ang travel restriction tungod kay kaganihang buntag lang nadawat sa Davao del Norte ang kopya sa maong Executive Order ni Mayor Sara Duterte-Carpio.
(OIC Michael Manguhig, RPN DXKT Davao)