DAVAO CITY – Opisyal nga gilunsad sa Kagamhanan sa Dakbayan sa Davao ang Davao City Interim Bus Service (DC Bus) atol sa pagsugod sa Pasko Fiesta sa Davao kaniadtong Nobyembre 27.
Mitambong sa kalihokan si Acting Mayor Sebastian Z. Duterte, Acting Vice Mayor Rodrigo Duterte II, ug uban pang opisyal sa dakbayan.
Sumala ni Project Manager Atty. Tristan Dwight P. Domingo, magsugod ang operasyon sa DC Bus sa Disyembre 5, ug molihok kini sa peak hours—6–10 a.m. ug 4–9 p.m., Lunes hangtod Sabado. Ang serbisyo maglangkob sa daghang mayor nga ruta, lakip ang Toril, Mintal, Bangkal, Buhangin, ug Panacan padulong sa Roxas o GE Torres.
Ang kumpletong lista sa mga bus stop ug dugang nga guidelines ipahibalo sa publiko sa dili madugay. Sa samang higayon, 22 ka bag-ong gihimong bus captain—kaniadto nga jeepney drivers ubos sa Social Development Program sa dakbayan—opisyal nga gipin ug gipaila-ila sa publiko atol sa paglunsad.(Camille Santos Naraga)(Source: Contributed)