DAVAO CITY – Niadtong Hulyo 21, 2025, pormal nga gidawat ni Davao City Acting Mayor Sebastian Z. Duterte si Her Excellency Makawadee Sumitmor, Thai Ambassador to the Philippines, atol sa iyang courtesy visit sa Matina Enclaves Residences.
Kauban sa embahadora ang Economic Counsellor nga si Yupawan Premchit Taniguchi ug Administrative Assistant Anna Lorraine Reyes. Kini ang unang opisyal nga pagbisita ni Ambassador Sumitmor sa Davao City, nga nagtumong sa pagpabakod sa relasyon sa Pilipinas ug Thailand, ilabi na sa habagatang bahin sa nasud.
Nagpokus ang ilang panaghisgot sa posibleng kooperasyon sa agribusiness ug renewable energy. Gipasabot ni Ambassador Sumitmor ang dakong papel sa Mindanao isip “food basket” sa nasud, ug nagpadayag siya sa interes sa umaabot nga Thai investments sa rehiyon.
Gisiguro ni Mayor Duterte ang suporta sa lungsod, ug giila ang Davao isip usa ka investor-friendly nga syudad nga seryoso sa agrikultural nga kalambuan. Giimbitar usab niya ang Thai delegation sa pag-apil sa umaabot nga Kadayawan Festival karong Agosto. (Camille Santos Naraga)(Source: Contributed)