DAVAO CITY – Nagtapos sa prisohan ang usa ka 42-anyos nga lalaki human giakusahan nga nangulata og drayber sa traysikel atol sa lalis kabahin sa relihiyon ug pletehan, alas 5:45 sa hapon niadtong Hunyo 5, sa Datu Abing Street, Barangay Calinan Poblacion, Calinan District.
Gisusi sa imbestigasyon sa kapulisan nga ang suspek mao si alyas Rey, 42-anyos, residente sa Barangay Bahi, Maragusan, Davao de Oro. Samtang ang biktima giila nga si alyas Hassan, 44-anyos, nga taga-Abayon Subdivision, Calinan.
Matod pa sa mga otoridad, hubog ang suspek ug pasahero sa traysikel ni Hassan. Sa ilang panag-istorya, misugod ang lalis kalabot sa plete ug relihiyon hangtod nga nahimong pisikal ang komprontasyon. Gidagmalan ni Rey si Hassan, hinungdan sa mga bun-og ug samad sa nawong sa biktima.
Dali nga misumbong ang mga nakasaksi ug mitawag og kapulisan, nga misikop dayon sa suspek.
Ang suspek mag-atubang og kasong physical injury,(Camille santos Naraga)(Source: Contributed)