DAVAO CITY – Nasikop ang usa ka 65-anyos nga lalaki nga nailhan sa alyas nga “Joel,” residente sa Bago Uma, Menterbro, Barangay Ilang, Davao City, human masakpi nga nagtipig og iligal nga droga ug pusil sa gipahigayon nga operasyon sa kapulisan.
Base sa report sa City Drug Enforcement Unit/Special Operations Group (SOG-DCPO) uban sa lain-laing yunit sa PNP, nadakpan ang suspetsado atol sa pagpatuman sa search warrant niadtong Sabado sa buntag, Nobyembre 8, 2025.
Narekober gikan sa suspek ang upat (4) ka sachet sa gituohang shabu ug usa (1) ka unit nga .9mm pistol. Ang iligal nga droga gitantiya nga mokantidad og ₱625,600.
Gikonsiderar usab ang maong lalaki nga High-Value Individual (HVI) Regional Priority Target No. 3 sa Rehiyon 11.(Camille Santos Naraga)(Source: Contributed)