DAVAO CITY – Nahitabong alas 5:50 sa buntag karong adlawa ang bangga sa duha ka pick-up truck sa Marilog District, Davao City.
Base sa inisyal nga imbestigasyon sa kapulisan, usa ka pick-up truck nga narehistro sa usa ka kompanya sa saging ang nagbiyaheng paingon sa Bukidnon. Pag-abot sa usa ka kurbadang bahin sa kalsada, kalit kini nabanggaan sa laing pick-up truck nga naggikan sa pikas direksyon, paingon sa sentro sa Davao City.
Tungod sa kusog nga impact, upat ka pasahero sa truck nga paingon sa Bukidnon ang nasamdan. Giila sila sa mga otoridad nga usa ka 25-anyos nga babaye, usa ka 1-anyos nga bata, usa ka 3-ka-buwan nga sanggol, ug usa ka 32-anyos nga babaye.
Mitug-an ang drayber sa pick-up truck nga paingon sa Davao City nga nakatulog siya samtang nagmaneho, hinungdan sa aksidente.
Usa ka pasahero sa samang sakyanan ang misalikway sa pagpadala sa ospital, base sa report sa mga otoridad.
Padayon ang pagbantay sa mga otoridad sa maong sitwasyon ug nanawagan sa mga motorista nga mag-amping kanunay, ilabi na sa mga kalsadang liko-liko.(Camille santos Naraga)(Source: Contributed)