DAVAO CITY – Patay ang usa ka 44-anyos nga lalaki human kini gipusil samtang nagtugway sa iyang mga kanding sa Purok 7, Sitio Pinagudlotan, Barangay Baganihan, Marilog District, Davao City, pasado alas 6:00 sa buntag.
Ang biktima, usa ka caretaker nga atong itago sa alyas “Don”, lumolupyo sa maong lugar. Samtang ang suspek, nga padayon pa giila sa kapulisan, dali kining mikalagiw human sa insidente.
Sumala sa imbestigasyon sa mga otoridad, nagtugway lang sa iyang mga kanding si Don sa daplin sa ilang pinuy-anan sa wala pa ang krimen. Matod sa iyang asawa, kalit nalang ningsinggit ang biktima og miingon nga gipusil siya sa likod. Misulay pa og dagan si Don pabalik sa ilang balay apan natumba tungod sa grabeng samad nga naangkon.
Wala pa makuntento ang mamumuno ug gisundan pa gyud si Don, diin gitiwasan siya og pusil nga hinungdan sa iyang hinanaling kamatayon.
Gipahibalo usab sa kapulisan nga lisod ang pagresponde sa lugar tungod kay hapit duha ka kilometros ang gilay-on gikan sa sementadong kalsada ug walay agianan ang mga sakyanan.
Padayon ang imbestigasyon aron mailhan, masikop, ug mapanubag ang responsable sa krimen.(Camille Santos Naraga)(Source: Contributed)