DAVAO CITY – Naluwas sa mga personahe sa National Bureau of Investigation Southeastern Mindanao Regional Office (NBI XI) ang tulo ka mga babaye nga biktima sa human trafficking nga paingon unta sa Singapore, human masakmit sa Davao International Airport niadtong Agosto 12.
Pinangunahan ni NBI XI Regional Director Atty. Arcelito Albao ang operasyon nga misangpot sa pagharang sa mga biktima sa dihang mosakay unta sila sa Scoot Airline flight. Sumala ni Atty. Albao, gi-recruit ang mga babaye sa mga suspetsado nga nailhan sa alyas nga “Lalang” ug “Yolly” aron magtrabaho isip mga “entertainers” sa maong nasud.
Nasuspetsahan sa mga immigration officers ang dokumento sa mga biktima ug namatikdan usab ang presensya sa pipila ka mga immigration personnel nga kasamtangang gipangita sa mga awtoridad.
Gihatod ang tulo ka biktima sa Department of Social Welfare and Development (DSWD) alang sa counseling samtang nagpadayon ang imbestigasyon sa NBI sa posibleng kalambigitan sa mga nabanggit nga immigration officers.
Pasakaan og kasong kriminal ang mga recruiters ug ilang mga kauban ubos sa Republic Act No. 10364 o Expanded Anti-Trafficking in Persons Act of 2012. (Camille Santos Naraga)(Source: Contributed)