DAVAO CITY – Trahedya ang nahitabo sa Brgy. Talus, Malungon, Sarangani, human namatay ang tulo ka miyembro sa usa ka pamilya sa bangga tali sa ilang sakyanan ug usa ka trailer truck alas 5:00 sa buntag, Miyerkules, Hunyo 4, 2025.
Ang mga biktima giila nga sila si Abdulmajid Sarapudin, 35-anyos, usa ka security guard; iyang asawa nga si Ivy Lou, 33-anyos; ug ilang 3-anyos nga anak nga si Coleen. Sila residente sa Brgy. Labangal, General Santos City.
Matod ni Malungon MDRRMO Operations Chief Arnel Pinque, paingon unta sa Davao City ang pamilya sa dihang nawad-an og kontrol sa pagmaneho si Abdulmajid. Misulod kini sa pikas lane ug didto nabanggaan ang trailer truck.
Dead on the spot ang tanang sakay sa awto. Giingon nga naglisud pa og retrieve sa ilang mga lawas ang mga otoridad tungod sa kakusog sa impact.
Samtang, anaa na sa kustodiya sa Malungon PNP ang driver sa trailer truck samtang nagpadayon ang imbestigasyon. (Camille Santos Naraga)(Source: Contributed)