Ang 18 ka kanhi miyembro sa Marines nga mitambong sa pagdungog sa Senate Blue Ribbon Committee nga gipangulohan ni Pia Cayetano, mikabo sa alegasyon nga nakadawat sila og ₱5 milyon matag usa isip bayad aron motestigo isip giingong mga “bagman” sa kanhing kongresista nga si Zaldy Co.
Gisalikway ni retiradong Marine Staff Sergeant Walter Manalansan ang maong alegasyon ug giingon nga dili kini tinuod. Gipasabot niya nga kung nakadawat siya og ingon kadako nga kantidad, magamit unta kini alang sa nagkinahanglang medikal nga pagtambal sa iyang pamilya, ilabina human sa kamatayon sa iyang igsoon.
“Dili tinuod nga nakadawat mi og ₱5 milyon. Kung naa pa koy kuwarta, nagamit ko na unta kini para sa pagtambal,” matod niya.
Samtang, si Melvin Matibag sa National Bureau of Investigation miingon nga nakadawat sila og impormasyon nga nag-ingon nga si kanhing kongresista Mike Defensor kunoy nagtanyag og ₱5 milyon matag usa sa 18 ka kanhing Marines aron motestigo.
Padayon pang ginapamatud-an sa mga awtoridad ang maong mga alegasyon samtang nagpadayon ang imbestigasyon sa Senado.(Camille Santos Naraga)(Source: Contributed)