DAVAO CITY – Kapin sa 2,200 ka mga residente gikan sa tulo ka barangay sa Talaingod, Davao del Norte ang nakadawat sa cash assistance ilalom sa Tulong Panghanapbuhay sa Ating Disadvantaged/Displaced Workers (TUPAD) Program sa Department of Labor and Employment (DOLE) niadtong Biyernes, Disyembre 12.
Ang payout gihimo human makompleto sa mga benepisyaryo ang ilang mga buluhaton sa community service, nga kabahin sa emergency employment nga gitanyag sa programa. Tumong niini ang paghatag og dugang panginabuhi ug pinansyal nga suporta sa mga displaced ug disadvantaged workers sa lugar.
Matod ni Davao del Norte 1st District Representative De Carlo “Oyo” Uy, ang maong programa dako og tabang sa mga pamilya sa Talaingod, ilabi na sa mga naapektuhan sa kakulang sa panginabuhi. Gipasalamatan usab niya ang DOLE sa ilang padayon nga kooperasyon ug suporta alang sa katawhan.(Camille Santos Naraga)(Source: Contributed)