Gipunting sa City Government of Dapitan ang paghimo og konkretong mga lakang aron mawagtang ang open defecation sa siyudad atol sa strategic planning meeting sa Dapitan City Zero Open Defecation Task Force (DCZOD-TF) niadtong Hulyo 22, 2026 sa City Government Amphitheater.
Gitumong sa maong pagplano ang pag-andam sa umaabot nga Zero Open Defecation (ZOD) launch ug pagpalig-on sa mga programa sa sanitasyon aron maprotektahan ang kahimsog sa publiko, mapauswag ang hygiene practices ug mapreserbar ang kalikupan.
Gipangulohan ni CLGOO Monette S. Ruaya-Ahmad ang miting diin gihisgutan ang mga konkretong action plan ug estratehiya aron mapapas ang open defecation sa mga komunidad sa Dapitan.
Mitambong usab si City Councilor Dennis A. Tan ug ABC Federation President Hamilcar F. Tacbaya, uban sa mga representante gikan sa Jose Rizal Memorial State University (JRMSU), Philippine National Police (PNP), nagkadaiyang opisina sa lokal nga kagamhanan ug mga partner stakeholders.
Pinaagi sa panagtambayayong sa nagkadaiyang ahensya ug sektor, gitinguha sa Dapitan City Government nga makab-ot ang ZOD-certified status ug mapalambo ang mas limpyo, mas himsog ug mas malungtarong palibot alang sa mga Dapitanon.
Ubos sa pagpanguna ni Mayor Evelyn “Belen” T. Uy, padayon nga gipalig-on sa lokal nga kagamhanan ang mga inisyatiba sa sanitasyon ug panglawas pinaagi sa hiniusang aksyon sa komunidad ug mga partner nga institusyon.(IKEN B. GULLEM)
Source: Dapitan City Government