Cebu City – Mikabat og 120 ka pamilya ang apektado sa sunog sa Sitio Superior, Brgy. Looc, dakbayan sa Mandaue human sa gihimong paghashas sa kagamhanang local gahapon.
Hangtod nianang alas 12 sa udto, nakatala ang buhatan sa CSWS o City Social Welfare and Services og 96 ka balay nanga ugdaw nga giokupahan sa 120 ka banay o 574 ka tawo.
Si SFO2 Edgar Vergara, imbestigador sa kabomberohan, miingon nga nakita sa ilang pakisusi nga ang kayo nanukad sa mi-spark nga linya sa poste sa koryente duol sa usa ka balay.
Suma pa ni Vergara, posibleng overload sa koryente hinungdan sa pag-spark tungod sa kadaghan sa mga balay nga naggamit og series lights subay sa nagsingabot nga Pasko diin sagad i direkta lang pagkonektar sa poste.
Matod ni Vergara, naglisod sila pagpaduol sa nahimutangan sa sunog tungod sa kagamay sa agianan hinungdang nalangay ang pagpawong nila sa kayo nga nagsugod mga alas 10:12 sa miaging gabii.
Gibanabana ni Vergara nga miabot og ₱ 1.4 milyon ang gibiling danyos sa maong sunog.
Sa iyang bahin, si Kapitan Allan Siazon sa Looc mitug-an nga ang mga nasunogan gipapasilong lang una sa ilang gymnasium ug sa duol nga tunghaang elementarya.
Gipahibawo usab ni Siazon nga magpatawag siyag emergency meeting sa konseho aroni paubos ang sityo Superior sa state of calamity para magamit ang ilang calamity funds pagtabang sa mga biktima. (via Jhon Tadlip/JTY, photo courtesy of contributed photo)
(Source: Mandaue City Fire Office)
