Natala sa dakbayan sa Sugbo ang labing daghang kaso sa coronavirus disease kun Covid 19 sud sa usa lang ka adlaw sukad sugdi ang ECQ kun enhanced community quarantine.
23 ka pasyente sa dakbayan ang nagpositibo sa uwahing resulta sa test sa virus kagahapon.
Sa maong gidaghanon, 21 sa sityo Zapatera, brgy. Luz ug tagsa sa Mambaling ug Guadalupe.
Sa nasayran, ang sityo Zapatera gi-lockdown na niadto pang Abril 7 dihang natala ang unang kaso sa Covid 19.
Pagka karon, aduna nay 29 ka kaso ang nahisgotang sityo ug giisip na nga hotspot.
Usa lang sa 29 ka positibo ang symptomatic o adunay mga sintoma ug ang uban wala o asymptomatic.
Gipagawas ang maong resulta human sa gipahigayong contact tracing ug massive testing.
Subay niini, ang taga CHD o city health department ug DOH mikuha og laing 200 ka swab samples gikan sa ubang tawo sa sityo aron mahiling.
Sa nasayran, laing kaso ang natala sa Good Shepherd, usa ka highland subdivision sa Barangay Labangon.
Sumala pa ni Mayor Edgardo Labella, bisag dili crowded ang lugar pero gipaubos gihapon kini sa total lockdown.