Tuloy ang dagdag sahod ng mga kawani ng gobyerno kahit magkaroon pa ng delay sa 2019 national budget.
Ayon kay House Majority Leader Rolando Andaya Jr., hindi maapektuhan ang inilaang 121.7 billion pesos na salary increase para sa mga kawani ng gobyerno sakaling hindi maaprubahan ang nasabing pambansang pondo.
Iginiit rin ni Andaya na magkaiba ang batas ukol sa dagdag-sahod ng mga sibilyan at military government employee kaya puwede itong ipatupad magkaroon man ng delay sa pag-apruba ng General Appropriations Act.
Samantala, nilinaw rin ni Andaya na nakatakdang ilabas ang unang sahod ng mga government personnel sa unang sweldo ng 2019 na ilalabas sa Enero 15.