Nagpirma og Memorandum of Agreement (MOA) ang Department of Agriculture Field Office X (DA-10) ug ang Department of Science and Technology–Philippine Atmospheric, Geophysical and Astronomical Services Administration (DOST-PAGASA) atol sa Niño Preparedness Press Conference ug MOA Signing.
Tumong sa kasabutan ang pagtukod sa usa ka Synoptic and Agrometeorological Station sa Dilawangan, Malaybalay City, Bukidnon, nga gikatakdang mag-operate 24/7 ug maghatag og obserbasyon matag tulo ka oras.
Pinaagi niini, mas mapalig-on ang pagmonitor sa panahon sama sa ulan, temperatura, kusog sa hangin, soil moisture ug solar radiation, nga makatabang sa mas tukmang pagdesisyon sa mga mag-uuma, lokal nga pangagamhanan ug komunidad.
Gilauman usab nga makatampo ang pasilidad sa pagpalambo sa early warning systems ug pagpalig-on sa climate-resilient agriculture aron mas maandam ang sektor sa agrikultura batok sa mga risgo nga dala sa pagbag-o sa panahon ug klima.
Anaa sa maong panagpermahay sila si DOST-PAGASA Weather Services Chief Ann Fortich ug DA FO X Regional Executive Director Jose Apollo Pacamalan.