Giinspeksyon sa mga awtoridad, kauban ang kapulisan ug lokal nga panggamhanan sa Villanueva, Misamis Oriental, ang usa ka kompanya sa puthaw, ang Keim Hing Steel Corporation nga nahimutang sa P-9, Sitio Kirahon, San Martin, Villanueva, Misamis Oriental.
Atol sa maong Joint Inspection and Assessment Team, gisusi kun aduna bay mga hazardous o delikado nga mga materyales ang anaa sa maong kompanya, sama sa nakita sa ubang steel corporation nga gipangsusi nga adunay radioactive materials.
Gibutyag ni Israel Permi, ang Special Assistant to the Mayor, nga gihimo ang maong inspeksyon tungod kay naalarma sila sa sunod-sunod nga inspeksyon sa mga planta sa Pilipinas, ug daghan ang maapektohan nga mga trabahante kun masirad-an kini.
Sa laing bahin, matud pa ni Engr. Roy Bordo, ang Municipal Administrator sa Villanueva, MisOr, compliant sa LGU level ang maong kompanya. Nakita sa maong inspeksyon nga walay nakitang kalapasan ang kompanya sa ngalan sa seguridad ug compliance. Apan tungod kay walay kapasidad ang munisipyo sa pagsukod sa radioactive status niini, dili pa kini nila opisyal nga mabutyag.
Dugang pa ni Bordo, dakong kawad-on sa lungsod kun adunay kalapasan ang maong kompanya ug masirad-an kini, busa padayon nila kining giinspeksyon. Mao usab kini ang ikaduhang higayon nga gihimo ang maong inspeksyon sa maong planta.
Lakip sa mga misaksi sa inspeksyon mao ang buhatan sa OBO, Business Permits and Licensing Office, Assessor’s Office, PESO, ug uban pang mga opisina sa munisipyo. | Cheleste Simene – Jomaya