Iriga City. Marso 16, 2020. Higot na ngunian na pagpapa-utob sa magkapirang banwaan sa Camarines Sur kan curfew for minors asin an pagbantay sa mga balik-bayan na hali sa ibang nasyon asin sa Metro Manila.
Ini an napag-araman kan Radyo Ronda, matapos na maka-olay an magkapirang alcalde nganing masunod an pinagboboot sa mensahe ni Pres. Rodrigo Roa Duterte asin kan Departamento de Salud.
Sa banwaan nin Baao, Nabua, asin mismo digde sa cuidad nin Iriga poon alas 10:00 nin bangui hasta alas 4:oo nin aga an curfew mientras na sa banwaan nin Buhi poon man alas 9:00 nin Bangui hasta alas 5:00 nin aga.
An iba pang banwaan nagkaigua naman kan siring na resolusyon, tanganing mailikay an mga juvenis sa ano man na peligro kan kinatatakutan na hilang.
Mientras tanto, ipinagsugo naman ngunian ni Gov. Migz Villafuerte kan Camarines Sur an higot na pagbantay sa mga balik-bayan na nagpuli hali sa metro manila asin iba pang nasyon matapos na ideklara an community quarantine ni Pres. Duterte.
Sigun sa gobernadora, kaipuhan ining asikasuhon kan mga alcalde asin mga kapitan nganing kun igua man sinda nin dara-darang hilang dai na maka-ulakit pa sa saindang kapamilya.
Kaipuhan man nindang sunudon an 14 dias na quarantine period, antes na magbaray-basay sa mga matawong lugar.
An dai man digde masunod, naka-andam man an mga autoridad na sinda dakupon asin dagos ng kasuhan huli sa pagbalga sa quarantine act of 2004.