Subling nanawagan ang local medical community ngadtu sa General Santos City government nga magpatawag na og Covid Summit, aron ma-awhag na ang tanang mga stakeholders sa paghimo og lakang batok sa coronavirus disease 2019 pandemic.
Sa giasoy ni Philippine Medical Association-General Santos chapter president, Dr. Fidel Peñamante, nga kinahanglang magtinabangay na ang tanan aron matapna ang pagkaylap sa virus, nga miigo na sa 4,875 ka mga residente sa siyudad.
Sa maong ihap, 566 sa mga niini ang nagpabilin pa sa mga balay-tambalanan.
Matod pa sa opisyal, mamahimo lamang epektibo ang kampaniya sa gobyerno kontra Covid kung nasayod ang tanang sektor sa tinuod nga sitwasyon sa dakbayan.
“Marami kaming alam na hindi alam ng ating mga kababayan, ng ating business community, ng ating mga lawmakers, kaya gusto namin na magpatawag na ng Covid summit, para once and for all, mapag-usapan ano pa ang dapat gawin natin,” ang tipik sa pamahayag sa opisyal.
Una nang girekomenda sa PMA ang pagpatuman og 14-day hard lockdown sa siyudad, taliwala sa gipatuman nang general community quarantine measures sa GenSan. (John Rey Somido)