Hayan malibkas na ang temporaryong pagpahunong byahe sa mga sakyanan sa kadagatan ug maka byahe na ang mga pasahero nga nanga tanggong sa lain laing pantalan sa Central Visayas.
Matod sa DOST-PAG-ASA nga mag landfall si Auring sa Guiuan Eastern Samar sayo sa hapon, Pebrero 22, 2021.
Gipahibaw sa PAG-ASA nga gilibkas na ang storm warning signal sa Southern Cebu, Bohol, Negros Oriental ug Siquijor sa ilang 8am bulletin.
Mopadung kini sa direksyon sa Masbate ug Panay ngadto na sa Mindoro.
Sayo niini , gipahibawo sa Coast Guard District Visayas nga 304 ka pasahero ang natanggong sa Sugbo samtang laing 67 ang na-stranded sa Negros Oriental pagka Pebrero 20 tungod sa hulga sa bagyong Auring.
Gawas sa natanggong nga mga pasahero, aduna usay 85 ka rolling cargoes, 21 ka barko, ug usa ka MBCA o motor banca nga lisensiyado sa MARINA ang gipugngan pagbiyahe sa Sugbo.
Gawas niini, 13 usab ka barko ug 15 MBCA ang nanago sa lainlaing pantalan sa Central Visayas.
Hangtod sa alas 5 samiaging hapon, base sa weather update sa PAGASA o Philippine Atmospheric, Geophysical, and Astronomical Services Administration, daghang uwan ang gibubo ni Auring sa CARAGA ug Eastern Visayas sa nianang gabii.
Ang susamang uwan nasinati usab sa Northern Mindanao, Bicol Region, MIMAROPA, Quezon, ug ang uban sa Caraga.
Tungod sa dakong uwan ug hangin nga da ni Auring, ang Coast Guard Station sa Central Visayas temporaryong misuspenso sa biyahe sa tanang matang sa barko nga magbiyahean sa pipila ka bahin sa Visayas and Mindanao. (Jhon Tadlip/JTY)
(Source: DOST-PAG-ASA | Coast Guard Central Visayas, photo courtesy of Coast Guard Central Visayas)
