Davao City — Gikanaug na sa Department of Health ang COVID-19 alert classification alang sa Davao City ngadto sa Alert Level 3 sa nahimong anunsiyo sa maong ahensya niadtong Agosto 13.
Kini na ang ikaduhang semana nga gipagawas sa DOH ang gihimong alert classification system, diin ang maong tinguha mao ang pag-ila ang severity sa COVID-19 incidence sa nagkadaiyang parte sa nasud.
Sumala sa bag-uhay lamang nga gipagawas na alert classification, ang dakbayan sa Davao, mga probinsya sa Davao Occidental ug Davao Oriental ang nabutang sa Alert Level 3.
Samtang ang ang Davao de Oro, Davao del Norte ug Davao del Sur nagpabilin ilawom sa Alert Level 2.
Sumala ni DOH Usec. Maria Rosario Vergeire, ang mga alert levels nga gipamutang sa matag probinsya, highly-urbanized nga mga siyudad, ug independent component city nga base sa pagsaka sa kaso sa COVID-19, hilabi na sa hospital utilization rates ug ang presensya sa Delta variant.
Samtang, sa nahimong regional status sa DOH-Davao, anaa lamang sa 24 porsyento sa mga kinatibuk-ang ICU beds ang bakante, 54.2 porsyento sa mga isolation beds ang bakante, 40 porsyento sa mga ward beds ug 54.3 porsyento sa mga ventilators ang nahibiling bakante.
Dugang pa, anaa sa “critical level” ang bed occupancy sa SPMC kon Southern Philippines Medical Center, human nga 89.13 porsyento sa ilang ICU beds ang okupado, samtang 85.01 porsyento sa ilang ward beds ang okupado.
Aron pangandamoan ang posibleng pagsaka sa mga pasyenteng dunay COVID-19, gitakda ngaablihan sa SPMC ang ilang modular hospital karong Domingo, Agosto 15.
(Source: Department of Health XI)