Cagayan de Oro City – Sa tinguha nga maluag-luagan ang Northern Mindanao Medical Center (NMMC), ang Cagayan de Oro City Hall nangita sa mga pamaagi sa pagpalapad sa No Balance Billing Progam sa Philhealth ngadto sa mga pribadong tambalanan. Si Mayor Oscar Moreno sa dakbayan nagtuo nga kini nga lakang dili lisod ipatuman sanglit nasugdan na kini sa lokal kagamhanan pagpakigpartner sa duha ka mga pribadong tambalanan alang sa maong katuyuan.
Ang NBB nahisukip ubos sa RA 10606 o ang National Health Insurance Act of 2013. Pinaagi sa Department of Health-10 ang City Hall nakig-partner sa uban sa Capitol University Center (CUMC) ug sa Xavier University-Maria Reyna Hospital (XUMRH) aron sa paghatag pagtagad sa mga kabus nga pasyente silong sa No Billing Policy (NBB) Policy.
Taliwala pa man sa kontrobersiya nga giatubang karon sa Philhealth, nagtuo ang Mayor nga ang maong opisina adunay mahinungdanong papel sa pagpundo alang sa mga lakang pagkab-ot sa quality medical services sa mga indigents sa nasud agig pagsanong sa RA 11223 o ang Universal Health Care Act nga gilagdaan ni President Rodrigo Duterte sa mianging tuig. Silong sa maong balaod, gipasabot sa Mayor atol sa usa ka press briefing nga gimanduan ang mga private hospitals sa paggahin sa 10% sa ilang wards alang sa mga indigent patients apan ang kasabutan tali sa City Hall uban sa CUMC ug XUMRH mao ang pagtugot diha sa ilang tambalanan sap ag-increase sa ilang akomodasyon ngadto na sa 20%.
Susama sa public hospitals, ang maong mga pasyente adunay zero balance billing. Sa pagkakaron sa XUMRH nakaserbisyo na sa 11 ka mga kabus nga pasyente samtang sa CUMC adunay lima ka mga indigent patients.
Gipaningakamutan karon sa City Hall nga mapalapdan pa ang ilang pagpakig-partner sa uban pang mga private hospitals aron makaserbisyo pa sa dugang indigent patients dinhi sa syudad.
(City Information Office)
