CAGAYAN DE ORO CITY – Paningkamotan gayod sa pangagamhanang lokal sa Cagayan de Oro nga makapadayon pagtunol sa libreng serbisyo medical ngadto sa mga kabus nga pamilya taliwala pa man sa kalangan pagbayad sa mga claims sa Philhealth nga nag-atubang ang maong programa sa bisan asang bahin sa mga hospital sa nasud, matud pa ni City Mayor Oscar Moreno.
Sa usa ka press briefing, gipasabot ni Mayor Moreno nga serbisyo kini nila sa katawhan ug mabayaran man sa Philhealth, bonus na kini, tungod kay ang City Hall nagagamit man niini ang bayad sa pagpadako sa ilang serbisyo ug pagpalit sa mga facilidad ug tambal alang sa mga constituents niini.
Ang Cagayan de Oro City Hall naghatag sa Philhealth coverage ngadto sa walo ka libong indigents households sa syudad apan wala maka renew sa ilang membership tungod sa nagpadayon nga Covid-19 pandemic. Sa iyang kabahin , gisugilon ni City Health Officer Dr. Lorraine Nery nga adunay moabot pito ka isolation units sa syudad nga gigamit nga puy-anan sa mga returning kagay-anons alang sa ilang duha ka semana nga quarantine ang nagpaabot pa sa bayad gikan sa Philhealth.
Si Mayor Moreno nga naghulagway sa Philhealth isip lifeline alang sa mga local governments panahon sa pandemic mipagula sa iyang kabalaka sa taho sa problema nga giatubang sa ahensya diin matud niya kabahin sa nakaapekto mao ang pagsira sa mga negosyo kansang mga tag-iya dili na makaremit sa kontribusyon sa ilang mga empleyado.
Pinaagi sa Philhealth, ang City Hall nakatunol sa libreng medical services ngadto sa mga indigent beneficiaries sa syudad pinaagi sa JR Borja General Hospital ug sa mga barangay health centers niini. Isip usa ka state insurance agency sa nasud, ang Philhealth nagkinahanglan usab nga makasurvive ug dili lamang magsalig sa gobierno tungod kay aduna usab kini mga programa nga kinahanglan punduhan alang sa mga Pilipinhon. (City Information Office)