Nagpasalig mismo si General Santos City Mayor Ronnel Rivera nga nagpabilin pa gihapong luwas ang siyudad, taliwala sa serye sa mga shooting incidents nga natala ning entrada pa lamang sa Hulyo.
Subli usab gipaniguro sa amahan sa siyudad nga ginahimo sa kapulisan ang tanan aron masigurong hapsay ug malinawon ang GenSan ug mahatagan og kasolbaran ang maong mga natala nga mga krimen.
Una nang gimanduan si Rivera si GSCPO chief, P/Colonel Gilberto Tuzon nga tan-awon ang tanang anggulo sa ginahimong imbestigasyon kalabot sa halos magkasunod nga shooting incidents nga natala sa siyudad ning Biyernes, July 10.
Gatuo usab ang city chief executive nga “nagkataon” lang nga halos magkadungan ang maong mga pagpamusil, gumikan sa lahi-lahi matod pa ang mga motibo ug angulong nakitan sa kapulisan.
“The PNP, they are doing their best.. Nagkataon lang siguro, actually, nagkataon lang ni. Lahi-lahi man (motive). Sa pikas man gud, more on personal o negosyo, kay murag coordinator man to sa usa ka investment. Dako ang puruhan nga maresolba nato,” ang tipik sa pamahayag ni Rivera.
Nanawagan usab si Rivera sa publiko sa kanunay nga pagsalig sa kapulisan ug ang igong kooperasyon aron magpabiling malinawon ang GenSan.
“Of course, wala’y question (safe ang GenSan). Dili ta dapat maalarma. Although pipila na ka insidente sa pagpamusil since June and July, but rest assured ginahimo nato ang tanan para masolbad ni.”
(John Rey Somido)