Cebu City – Miluwat na ug official nga pamahayag ang tambalanan nga maoy nag atiman sa duha managsoon nga sakop sa prominenting Sugboanon kinsa namatay sud sa ilahang pasilidad sa Dakbayan sa Sugbo.
Sa ilahang Official Facebook page, ang Chong Hua Hospital kon CHH miladlad sa ilahang ponto ug pagpasabot sa ilahang habig bisan pa man kon wala kini direkta hinganli nila ni Gobernador Gwendolyn Garcia ug Kongresista Pablo Jhon Garcia kinsa mipahibaw sa publiko sa tinguha nila pagpangayo ug expert opinion.
Kini aron pagsuta kon tukma ba o dili ang pag-atiman sa CHH, diin nag sunod nga namatay sila si kanhi Dumanjug Mayor Nelson Garcia ug Barili Mayor Marlon Garcia sa unang semana sa buwan sa Septembre 2020.
Sa ilahang bahin, ang CHH mitonol sa ilahang pahasubo ngadto sa pamilya sa namatay.
Matod sa kadagkuan sa tambalan nga ang ilahang team sa mga medical experts naghatag ug labing maayong pag-atiman ngadto sa ilahang mga pasyente ug ang ilahang mga gipang buhat base kini sa experience isip doctors ug medical practitioners ug base sa ” verified data”.
Gipasabot sa maong medical institution nga ang ilang aksyon pinasubay sa globally- accepted and clinically-established procedures basi sa ilang diagnose sa pasyente.
Mi depensa sab ang tambalan sa duha ka mga doktor nga nag atiman sa managsoong Garcia ug alang kanila pulos kini mga espesyalista sa ilahang trabaho.
Una niini, mipahibaw sa publiko sila si Gwen ug si Pablo Jhon sa ilang personal nga kapasidad sa ilahang tinguha nga pagpaimbestiga sa protocol ug practice sa Chong Hua labot sa pag atiman sa nilang Marlon ug Nelson kinsa namatay sud sa maong tambalanan.
(Jhon Tadlip/ JTY)
(Source: Sugbo News & Chong Hua Hospital Facebook Page)