Cagayan de Oro – AGI’G pagsaulog sa World Leprosy Day karong Enero 28, magpahigayon og “Kutis Kilatis” o Skin Examination ang City Health Office (CHO) sa nagkalain-laing barangay ning syudad sa umaabot nga mga adlaw.
Matud ni Assistant City Health Officer-Designate Dr Claire Paglinawan, dili na angay ikahadlok ang sakit nga sangla o Leprosy sanglit aduna na man kini tambal nga makapaayo ug makapawala sa maong sakit.
Dugang ni Dr. Paglinawan nga bisan tuod og makatakod ang maong sakit apan tungod kay matambalan na man kini angayan lamang nga dili ikaulaw sa mataptan niini nga moduol gilayon sa ilang buhatan alang sa early detection.
Nasayran nga ang World Leprosy Day saulogon matag katapusang Domingo sa Enero matag tuig.
Lakip sa mga sintomas sa maong sakit ang skin lessions (o morag ap-ap nga pagputi-puti sa panit), muscle weakness o pagluya sa kalawasan ug numbness.
Subay niini, nanawagan si Dr. Paglinawan nga pahimuslan ang umaabot nga ‘Kutis Kilatis’ (Skin Examination karong Enero 28, ingon man suporta sa katawhan ilabina sa pamilya sa mga nakasinati sa maong sakit.
News and photo courtesy of CIO CDO