Usa ka lalaki ang nakabsan sa kinabuhi human gitigbas sa usa ka bukirang lugar sa Sitio Tampaon, Barangay Banawe, lungsod sa Pamplona, Negros Oriental, kagahapon sa hapon.
Giila ang biktima nga si Diosdado Dalmacion, hamtong nga residente sa maong dapit. Samtang ang suspek nga si Oscar Magallanes Lisondra, 47 anyos, taga-Sitio Ilalan, Barangay Yupisan, daling nadakpan sa mga otoridad ang suspetsado human sa insidente.
Sumala sa report sa Pamplona Municipal Police Station, nakadawat sila og tawag gikan sa usa ka concerned citizen bahin sa nahitabong krimen.
Daling mirespondi ang kapulisan sa maong panghitabo bisan paman sa kalayo sa maong lugar.
Matud pa sa kapulisan, dili maagian sa sakyanan ang dalan padulong sa Sitio Tampaon, hinungdan nga napugos sila og lakaw sulod sa duha ka oras aron makaabot sa lugar. Bisan pa sa kalisod sa biyahe, nagpadayon gihapon ang operasyon hangtod nadakpan ang suspek.
Karon, anaa na sa kustodiya sa kapulisan si Lisondra ug nagpabilin nga wala pa mosulti sa motibo sa krimen. Padayon pa ang imbestigasyon samtang giandam ang posibleng kasong ipasaka batok kaniya. | via Renante Socia Lada
📸 Pamplona MPS/ Roy Ortega