Nadakpan ang usa ka barangay opisyal kaganihang sayong kabuntagon atol sa operasyon sa kapulisan sa Toledo City tungod sa pagpanag-iya og ilegal nga pusil.
Ang operasyon gipangulohan sa Cebu Police Provincial Office uban sa Provincial Intelligence Unit, Toledo City Police Station ug 2nd Provincial Mobile Force Company. Nahimo kini human sa dugay nga surveillance nga miresulta sa pagpagawas og search warrant batok sa suspek tungod sa paglapas sa balaod sa armas.
Sa pagpatuman sa search warrant, gisunod sa kapulisan ang hustong proseso aron pagrespito sa tawganong katungod uban sa mga saksi.
Nasakmit sa operasyon ang usa ka .45 kalibre nga pusil nga walay serial number, pito ka buok bala, ug usa ka magasize. Wala makapakita ang suspek og lisensya o legal nga papeles, hinungdan nga siya daling gidakop.
Sumala sa imbestigasyon, gigamit ra kuno sa suspek ang pusil alang sa personal nga katuyoan, apan giila kini sa kapulisan nga posible nga hulga sa kaluwasan sa publiko.
Sa pagkakaron, anaa na sa kustodiya sa kapulisan ang suspek samtang giandam ang kaso batok kaniya tungod sa paglapas sa Republic Act 10591 o Comprehensive Firearms and Ammunition Regulation Act.
Gidayeg ni PCOL Abubakar Udang Mangelen Jr. ang mga pulis sa malampusong operasyon ug gipasiugda nga padayon nilang pakusgon ang kampanya batok sa ilegal nga armas aron mapanalipdan ang katawhan sa Sugbo.
Source: CPPO